Aqtóbe oblysynda elimizdegi eń iri «jasyl» energetıka jobalarynyń biri – qýaty 150 megavatt bolatyn «Hromtaý» jel elektr stansasynyń qosylý rásimi ótti, dep jazady Egemen.kz.
Aldaǵy ýaqytta jylyna 500 mıllıon KV/saǵ-tan astam elektr qýatyn óndiretin jobany Eurasian Resources Group (ERG) iske asyrdy. Sondaı-aq osy JES-y jyl saıyn 440 myń tonnaǵa deıin kómirqyshqyl gazy shyǵaryndylarynyń aldyn alyp, 300 myń tonnadan astam kómirdi únemdeýge múmkindik beredi. Aıta ketý kerek, 2024 jyldyń jeltoqsanynda Hromtaý JES-nyń alǵashqy eki qondyrǵysy elektr qýatyn óndire bastasa, 2025 jyldyń 1 qańtarynda alǵashqy mıllıon KV/saǵ berdi. Búginde barlyq týrbınalar qondyrylyp bitti.
Hromtaý aýdanynda ótken saltanatty rásimge Aqtóbe oblysynyń ákimi Ashat Shaharov, ERG Dırektorlar keńesiniń tóraǵasy, Bas atqarýshy dırektory Shýhrat Ibragımov qatysty, dep habarlaıdy egemen.kz.
«Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Prezıdent Joldaýyna sáıkes, Aqtóbe oblysynda da ınvestısııalar men ınnovasııaǵa, zamanaýı óndiristi damytýǵa basymdyq berilip keledi. О́ńirde negizgi kapıtalǵa salynǵan ınvestısııa kólemi jyl basynan beri 590,1 mlrd teńgege jetip, ótken jyldyń osy kezeńimen salystyrǵanda, 52,7 %-ǵa ósti. Bul kórsetkishter Aqtóbe oblysynyń joǵary ınvestısııalyq áleýetin jáne bıznes tarapynan senimniń artyp kele jatqanyn kórstetedi Al, «Hromtaý» jel elektr stansııasynda 25 jańa jumys orny ashylady», dep atap kórsetti óńir basshysy Ashat Shaharov.
«Búgin ERG-nyń alǵashqy jel energetıkasy jobasy Aqtóbe oblysynda iske asyrylǵanyna kýá bolyp otyrmyz. «Hromtaý» JES-y –Qazaqstandaǵy jańartylatyn qýat kózderiniń úlesin arttyrý maqsatynda bizdiń qosqan úlesimiz. Jobany ERG Capital Projects kompanııasy Qazaqstannyń Damý Bankiniń qarjylyq qoldaýymen iske asyrdy. Qurylysqa quıylǵan ınvestısııa kólemi –74 mıllıard teńgeden asty. ERG árqashan ESG qaǵıdattaryna súıenip jumys isteıdi. Álemde joǵary sapasymen tanylǵan hrom kenin biz ekologııalyq turǵydan taza óndire otyryp, burynǵydan da básekege qabilettirek etýge tyrysamyz. Osylaısha ERG metallýrgııany bolashaqtyń ajyramas bóligine aınaldyrady», dep atap kórsetti ERG Dırektorlar keńesiniń tóraǵasy, Bas atqarýshy dırektory Shýhrat Ibragımov saltanatty rásimde. JES «Qazhrom» TUK» AQ quramyndaǵy Dóń taý-ken baıytý kombınatynyń mańynda salyndy.
2023 jyly dekarbondendirý strategııasyn ázirlegen ERG taıaýda energetıka dıvızıonyna kiretin boldy. Ol Dýbaıda ótken COP 28 Búkilálemdik klımat sammıtinde tanystyrylǵan. Osy strategııa aıasynda jalpy ınvestısııa kólemi 300 mln AQSh dollaryn quraıtyn jobalar júzege asyrylýda. Temir keni dıvızıonynda Qashar jylý ortalyǵy gazǵa aýystyrylsa, allıýmınıı dıvızıonynda býdy tutynýdy azaıtý baǵdarlamasy engizilýde, jańa kalsınasııa peshteri men qarashirindi óndirisin jetildirý jumystary júrip jatyr. Sondaı-aq Aqtóbe ferroqorytpa zaýytynda qaıtalama qýat kózderin elektr togyna aınaldyratyn stansııa salynyp jatyr.
«Qazaqstannyń Damý banki elimizdegi jańartylatyn energetıka salasyndaǵy jobalardy qarjylandyrýǵa basymdyq beredi. Biz osylaısha eldiń dekarbonızasııa maqsattaryna jáne energetıkalyq qaýipsizdigin qamtamasyz etýge úles qosatyn jańa generasııa kózderiniń qurylysyn qoldaımyz. «Hromtaý» JES damý ınstıtýttary men bıznestiń birigip, Qazaqstannyń «jasyl» ekonomıkasynyń negizin qalaıtyn aýqymdy jobalardy júzege asyryp jatqan kórsetedi», deıdi Qazaqstannyń Damý Banki basqarma tóraǵasy Marat Elibaev.
Aqtóbe oblysy